МЧБХ-г 125 сая төгрөгөөр торгожээ
Дэлхийн нэгдсэн бөхийн холбооноос манай улсын тамирчдыг олон улсын тэмцээнд оруулахгүй байх шийдвэрийг хэвээр үлдээжээ. Мөн дасгалжуулагч Ц.Цогтбаяр, Б.Баяраа нарын эрхийг гурван жилийн хугацаагаар хасах шийдвэр гаргасан байна.
"Рио-2016” олимпийн чөлөөт бөхийн эрэгтэйчүүдийн 65 кг-ийн жинд ДАШТ-ий хошой хүрэл медальт, гавьяат тамирчин Г.Мандахнаран зодоглосон.Тэрбээр дагах барилдаан хийж, хүрэл медалийн төлөө ДАШТ-ий мөнгө, Азийн наадмын хүрэл, Азийн АШТ-ий мөнгө, хүрэл медальт, Узбекстаны Наврузовтай барилдсан. Шүүгчид Узбекстаны бөхөд ялалтыг өгсөн билээ. Шүүгчдийн энэхүү шийдвэрийг Г.Мандахнарангийн хоёр дасгалжуулагч эсэргүүцэн, чөлөөт бөхийн дэвжээнээ хувцсаа тайлж, дургүйцлээ илэрхийлсэн. Тэдний эл үйлдлийг Дэлхийн бөхийн нэгдсэн холбооноос сахилга бат зөрчиж, спортын нэр хүндийг гутаасан гэдэг үндэслэлээр манай улсын бүх насны тамирчдыг олон улсын аль ч тэмцээнд оролцуулахгүй байх тухай мэдэгдэл ирүүлсэн. Тус албан бичигт энэ сарын 1-ний дотор өөрийн байр сууриа илэрхийлэн хариу мэдэгдэхийг МЧБХ-ноос шаардсан байв. Улмаар МЧБХ-ноос шигшээ багийн ахлах дасгалжуулагч Ц.Цогтбаяр, дасгалжуулагч Б.Баяраа нарыг олон улс болон дотоодын бүх тэмцээн, чөлөөт бөхийн үйл ажиллагаанд оролцох эрхийг хассан тухай хариу мэдэгдэл хүргүүлсэн.
Гэвч Дэлхийн нэгдсэн бөхийн холбооноос хоёр дасгалжуулагчын эрхийг гурван жилийн хугацаагаар хасах шийдвэр гаргажээ. Мөн МЧБХ-г 50 мянган еврогоор /125 сая төгрөг/ торгож, Монгол тамирчдыг тэмцээнд оролцуулахгүй байх шийдэлд хүрсэн байна. Гэхдээ 50 мянган еврог төлсөн тохиолдолд тамирчид олон улсын тэмцээнд оролцох эрхтэй болох ажээ. Үндсэндээ 50 мянган еврогоор тамирчдынхаа тэмцээнд оролцох эрхийг сэргээхийг санал болгосон аж.
Г.Тэгшсүрэн
http://www.shuud.mn/content/read/473622.htm
Санал болгох
