Р.Сэддоржийн тэргүүлсэн Өмнөговь аймаг "Тэрбум мод" үндэсний хөдөлгөөнд хамгийн идэвхтэй оролцож байна

"Тэрбум мод" үндэсний хөдөлгөөн зарлагдснаас хойш аймаг, сум, нийслэл, дүүрэг, айл өрх бүр чадах чинээгээрээ мод тарьж амьдрах орчноо өнгөтэй өөдтэй, амьдрахад ээлтэй болгохоор зүтгэж байгаа билээ. Тэр дундаа хот орчмын ногоон байгууламжийг сайжруулах, ногооруулах үүрэг амлалтыг аймаг, дүүрэг бүр аваад байгаа юм. 

 

Монгол Улсын Ерөнхийлөгч У.Хүрэлсүхийг “Тэрбум мод” үндэсний хөтөлбөрийг зарласнаас хойш жишиг болохуйц санаачилгыг Өмнөговь аймаг хэрэгжүүлж эхлээд байна. Уг төслийн хүрээнд Өмнөговь аймгийн Даланзадгад хотод, хот орчмын тохижилтын ажлыг удахгүй эхлэхээр бэлтгэж байгаа бөгөөд  Засаг дарга Р.Сэддоржийн санаачилгаар энэхүү төслийн хүрээнд Даланзадгад хотын төв садыг тохижуулах ажлыг орон нутгийн төсвийн хөрөнгө оруулалтаар хийж гүйцэтгэхээр болсон байна. Энэхүү ажлын хүрээнд төв садан доторхи явган зам, тохижилт, хашаа, хайсны суурь, сад тойрсон явган замыг шинэчлэх бөгөөд тухайн орчинд олон төрлийн мод бутыг дахин тарьж, нэмж зүлэгжүүлэн орчныг нь улам сайжруулахаар болсон аж. 

 

Энэхүү санаачилга нь Нэгдсэн үндэсний байгууллага, Дэлхийн эрүүл мэндийн байгууллагаас зарласан Тогтвортой хөгжлийн үндсэн зарчим болох Хүрээлэн буй орчны эрүүл мэндийг сайжруулах зорилтыг орон нутгийн түвшинд биелүүлэхийн зэрэгцээ хүн бүрт хүртээмжтэй ногоон байгууламж барихаар төлөвлөж байгаа нь орон нутгийн иргэдийн талархалыг хүлээсэн төслүүдийн нэг яахын аргагүй мөн гэж иргэд нь ам сайтай байгаа аж.  

 

Өмнөговь аймаг нь "Тэрбум мод" үндэсний хөдөлгөөний хүрээнд 2030 он хүртэл нийт 70 сая мод тарих амлалт аваад байгаа бөгөөд тус аймгийн нутаг дэвсгэрт үйл ажиллагаа явуулж буй уул уурхайн компаниуд 371 сая мод тарихаар болсон байна. Энэ дагуу 2030 он гэхэд Өмнөговь аймагт 400 гаруй сая модыг тарьж, ургуулах юм. Энэ нь “Тэрбум мод” хөтөлбөрийн хүрээнд тарих модны 40 гаруй хувийг эзэлж байгаа билээ.

 

 

Э.Сүрэн