Сар шинийн өдрүүдэд Улаанбаатар-Дархан чиглэлд Рейлбус галт тэрэг явна

Урвуулагч хэмээх шороон гахай жилийн сар шинийн өдрүүдэд УБТЗ-аас иргэдэд үйлчилгээгээ ойртуулан түргэн шуурхай үйлчлэх үүднээас Дархан-Улаанбаатар чиглэлд нэмэлтээр Рейлбус галт тэргийг явуулахаар болжээ.

Тодруулбал хоёрдугаар сарын 4ны өдрөөс буюу битүүний өдрөөс эхлэн 10-ны өдрийг дуустал Дархан-Улаанбаатар, Улаанбаатар-Дархан чиглэлд 961,962-р галт тэрэг буюу Рейлбус, шинийн 1,2,3-ны өдрүүдэд Дархан-Сүхбаатар, Сүхбаатар-Дархан чиглэд 963,964-р галт тэргийг нэмэлтээр явуулахаар болсон байна.

Улаанбаатар-Дархан чиглэлд дээр дурдсан өдрүүдэд Рейлбус галт тэрэг өглөө 09.00 цагт хөдөлж 13.10 цагт Дарханд хүрэхаж.Дархан-Улаанбаатар чиглэлийн Рейлбус 13.45 цагт хөдөлж Улаанбаатар хотод 18.18 цагт хүрэх ажээ.

Мөн Дархан-Сүхбаатар чиглэлийн галт тэрэг 10.25 цагт хөдөлж 12.20 цагт Сүхбаатар өртөөнд хүрэх аж.Сүхбаатар-Дархан чиглэлд 13.05 цагт хөдөлж 15.01 цагт Дархан өртөөнд ирэх ажээ.

Зорчих тасалбарын үнийн тухайд Улаанбаатар-Дархан, Дархан-Улаанбаатар чиглэлийн Рейлбус том хүн 14.600 төгрөг, хүүхэд 6400 төгрөгөөр зорчих аж.

Дархан-Сүхбаатар, Сүхбаатар-Дархан чиглэлийн галт тэрэг том хүн 2900 төгрөг, хүүхэд 1000 төгрөгөөр зорчих ажээ.

Сар шинийн баярын өдрүүдэд Улаанбаатар хот, Дархан, Сэлэнгэ, Орхон аймгуудын авто замын ачаалал ихэсдэг тул ийнхүү жил бүр нэмэлт галт тэргийг явуулдаг аж.

Л.Эрдэмт