“Эрдэнэ зам” компанийн захирлын барьж буй тамга тэмдгийг хүчингүй болгожээ

 

Нийслэлийн Захиргааны хэргийн анхан шатны шүүхээс "Эрдэнэ зам” компанийн улсын бүртгэлийн гэрчилгээ болон тамга тэмдгийг хүчингүйд тооцож хураан авахыг Оюуны өмч, улсын бүртгэлийн газарт даалгажээ. Тодруулбал, тус компанийн гүйцэтгэх захирлаар ажиллаж буй Г.Өлзийдүүрэнгийн эзэмшиж буй тамга, тэмдгийг хүчингүйд тооцсон байна. Зарим эх сурвалж "Г.Өлзийдүүрэн нь Нийслэлийн Захиргааны хэргийн анхан шатны шүүхийн дээрх шийдвэрийг үл тоон тамга тэмдгээ ашиглан үйл ажиллагаа явуулсаар байх магадлал өндөртэй. Учир нь тэрбээр өнөөг хүртэл Оюуны өмч, улсын бүртгэлийн газарт компанийн улсын бүртгэлийн гэрчилгээ, тамга тэмдгээ хүлээлгэж өгөөгүй байгаа” гэсэн юм.

 

 

Түүнчлэн хууль хяналтын байгууллагаас бусдын итгэл үнэмшлийг олж авах замаар эд хөрөнгө, компани, аж ахуйн нэгж гэх мэт хөрөнгийг нь өөрийнхөө нэр дээр шилжүүлэн залилдаг гэмт хэрэг сүүлийн жилүүдэд ихсэх хандлагатай байгааг ард иргэдэд сэрэмжлүүлж байгаа юм. "Эрдэнэ зам” компанитай холбоотой энэхүү хэрэг нь залилангийн энэ төрлийн гэмт хэрэг байх магадлалтай байгаа бөгөөд Чингэлтэй дүүргийн цагдаагийн хэлтэст Г.Өлзийдүүрэнтэй холбогдуулан шалгаж байгаа аж.

 

 

Зам арчлалт, засварын "Эрдэнэ зам” компани нь 1997 онд байгуулагдсан бөгөөд 2013 оноос "Бишрэлт холдинг” группын охин компани болон тасралтгүй үйл ажиллагаа явуулж байгаа юм. Энэ үеэс Г.Өлзийдүүрэнг тус компанийн гүйцэтгэх захирлаар тоилсон бөгөөд тэрбээр томоохон тендерүүд олж авах нэрийдлээр 2016 онд компанийн 20 тэрбум төгрөгөөр үнэлэгдэх энгийн хувьцааг өөрийн нэр дээр шилжүүлэн авсан байдаг. Улмаар 1.5 тэрбум төгрөгийг хувьдаа завшсан байх магадлалтай нь баримтаар нотлогдоод байгаа аж.

 

Х.Төгөлдөр

скачать dle 12.0